UMfundi wase-UKZN Ubuye Nomklomelo weThusi Emidlalweni yamaNyuvesi Omhlaba Wonke

BY: .

Click here for English version

UMnu Osman Ghoor, nongumfundi we-Postgraduate Diploma in Accounting, kamuva nje uqhudelane nabanye emncintiswanweni we-FISU (International University Sports Federation) owaziwa ngele-World University Combat Games e-Samsun, ezweni lase-Turkey.

U-Ghoor - nobambe iqhaza ezimele kowe-Kumite esigabeni sama-75kg kanti futhi ubephinde abe yingxenye yethimba labadlali baseNingizimu Afrika nelihlomule ngomklomelo wethusi - uthe: ‘Lona ngumklomelo omkhulu kakhulu njengeqembu laseNingizimu Afrika esiwutholile njengoba leli qembu lingakaze lihlomule izindondo eminyakeni eyishumi nanhlanu eyedlule. Nginethemba lokuqhubeka ngihlomule ngezindondo, uma uMdali esavuma, nokuthi ngenze izwe lami ukuba liziqhenye ngami.’

U-Ghoor waqala uhambo lwakhe lokudlala iKarate eneminyaka emine, wagqugquzelwa kakhulu nguyise nokunguyena owamfaka kulo mdlalo waze wamkhuthaza ukuba aqhubeke nawo. Amava akhe kulo mdlalo asevile eminyakeni eyi-19, u-Ghoor usenebhande le-Dan black izikhawu ezintathu, nalinika ubaba wakhe uMnu Ahmed Ghoor. ‘Konke ukuzilolonga kwami kuhlelwa ngubaba, nophinde abe nguMqeqeshi wami. Ngakho ke konke ukuphumelela kwami nemiklomelo yonke engiyoke ngiyithole emidlalweni yekarate iyohlezi iphansi kwephiko lakhe, kanye nasolwazini analo njengengqwele,’ usho kanje.

U-Ghoor uqale amalungiselelo akhe alo mncintiswano kusukela esikhathini esevile onyakeni waze waba sesigabeni sokuncintisana kuma-trials asemidlalweni yabafundi basemaNyuvesi ahlukene eNingizimu Afrika neyaziwa ngelama-USSA neyayibanjwe ngenyanga kaNtulikazi kophezulu. Ubeke inkulumo yakhe wabe esegqamisa ukujula kokuziqeqesha kwakhe nokwenzeka njalo ekuseni nantambama osukwini kusukela ngoMsombuluko kuya kuLwesihlanu nokufaka phakathi i-sparring, nokwenza/ukugijima ngokushesha, ukufaka amandla kanye ne-plyometric training.

Njengomunye wabafundi abafunda ngomfundaze wezemidlalo, ubonge kakhulu iNyuvesi ngokumxhasa ohanjeni lwakhe oluya kuma-World Combat Games nokumupha ithuba lokuthi isikhungo sakhe siziqhenye ngaye. ‘Ngijabule futhi ngithobekile kakhulu ngokukwazi ukuba yingxenye ye-UKZN njengoba ngikwazile ukubuya nemedali yethusi, kungenxa yokwesekwa engikuthola eNyuvesi nokukholelwa kimi. Ngiyabonga UKZN!’

Yize noma u-Ghoor, obegxile kakhulu ethonamentini, futhi engazange alithole ithuba lokubona indawo azule ngesikhathi ehleli izinsuku eziyishumi ezweni lase-Turkey, ulitholile ithuba lokuzitika nge-Baklava kanye nezicoficofi zase-Turkey.

Izinhlelo zakhe ngekusasa zifaka phakathi ukuqedela izifundo zakhe njenge-Chartered Accountant kanye nokuhlomula ngendondo yegolide emidlalweni ye-World Karate Federation – nokuzomenza ukuba abe ngowokuqala ngqa eNingizimu Afrika ukuthola lo mklomelo.

Amagama: nguHlengiwe Khwela

Isithombe: Sithunyelwe