Abasebenzi nezitshudeni base-AHRI benabafundi base-Bonela Secondary School eThekwini ngeSonto LeSayensi Ezweni.I-UKZN Igubha ISonto LeSayensi Ezweni
Click here for English version
Minyaka yonke, njalo ngesonto lokuqala langoNcwaba, iNingizimu Afrika igubha iSonto LeSayensi Ezweni, okungumkhankaso woMnyango WezeSayensi noKusungula ngenhloso yokuqhakambisa izihloko nemisebenzi kweSayensi, Ubuchwepheshe, Ubunjiniyela neZibalo emphakathini wonke, kafushane.
Kulo nyaka iSTEC@UKZN ihlangane ne-Africa Health Research Institute (i-AHRI) ukuqhakambisa iSayensi kubantu. iSTEC@UKZN yisikhungo sangaphakathi eNyuvesi esiseKolishi lezoLimo, ezobuNjiniyela nezeSayensi ekhempasini yaseWestville, kanti i-AHRI yisikhungo esizimele esicwaninga ngesayensi emikhakheni eminingi esisemakhempasini amabili KwaZulu-Natal, kanti lena eseThekwini iseSikoleni SezobuDokotela sase-UKZN.
Ngezinsuku ezintathu zokuqala zangoNcwaba bekuphithiza emalebhu e-AHRI njengoba bekuvakashe abafundi beBanga le-11 base: Bonela Secondary, Umkhumbane Secondary naseChesterville Secondary. Kulesi sikhungo esihlonishwayo emhlabeni, abafundi bebezofunda ngokuthi yini ukuba ngumcwaningi noma uchwepheshe wasegumbini lokucwaninga. Abasebenzi base-AHRI baphume ngobuningi babo, benza umsebenzi wabo belungiselela ukuwukhombisa ososayensi bangomuso, baxoxa nabo ngomsebenzi abawenza nsuku zonke nangocwaningo lwabo olusezingeni eliphezulu ngezifo ezinjengesandulela-ngculazi, iTB kanye neCOVID-19.
Abacwaningi ababili abasafufusa, nenduna yaselebhu yase-AHRI uDkt Sandile Cele nomfundi owenza iziqu zobudokotela e-UKZN uNks Zakithi Mkhize bakhulume ngocwaningo lwabo lweCOVID-19 nesandulela-ngculazi ezifundisweni ebezigcwele phama. I-What Do Scientists Do? A Look Inside the Ivory Tower kuqhubekile kwaba wuchungechunge lezinkulumo ezifundisayo ezibheke izihloko eziningi ezithinta isayensi.
UCele ukhulume nge“Behind the Scenes of COVID-19”, wakhuluma ngokuba yingxenye yabacwaningi baseNingizimu Afrika nasemhlabeni jikelele ekubhekaneni neCOVID-19. Wayesekhaleni lokucwaninga bukhoma i-Beta variant yeCOVID-19. Ngaphezu kwalokho ubesocwaningweni olubheke ukushintsha kwamagciwane eningizimu nasenkabeni ye-Afrika kanti umsebenzi wakhe ube neqhaza elikhulu ocwaningweni ngeCOVID-19. UMkhize, enkulumweni yakhe, ethi Doing HIV Research in the Lab: The Hunt for the Cure Continues uqhubekile nokucobelela ngomsebenzi wakhe ezifundweni zokwelapha isandulela-ngculazi, ikakhulukazi isimo sokushintsha nokucasha kwegciwane.
Imigubho yesonto leSayensi ezweni iphothulwe ngosuku oluvulelekile, obeluhlelwe yiSTEC@UKZN. Kwemukelwe abafundi nabasebenzi eScience Centre, bakhonjiswa ubuhle beGeological Museum yase-UKZN nemibukiso yezinto ezenziwa kulesi Sikhungo.
‘Inhloso yethu wukuletha iSayensi emphakathini nokukhombisa ngobuhle nothando lwalesi sifundo esimnandi nesimqoka kangaka,’ kusho uMdidiyeli weSTEC, uDkt Tanja Reinhardt. ‘Uma singafinyelela kososayensi bangomuso baseNingizimu Afrika ngenkathi besasezikoleni, sitshale uthando lokwenza umsebenzi weSayensi, kuyosho ukuthi siphumelele ukwenza umsebenzi wethu.’
Amagama nezithombe: wu-Sally Frost