Umkhakha Wezifundo Zenhlalakahle e-UKZN Wamukele Abafundi BaseJalimane

BY: .

Click here for English version

Abafundi abangama-22 base-Fachhochschule Dortmund University eJalimane basanda kuvakashela isikole se-Applied Human Sciences sase-UKZN ngokohlelo lokushintshana ngabafundi amasonto amabili.

Lolu hlelo luyingxenye ye-Internationalisation for Building Competencies Project (i-IFBC), ukubambisana phakathi kwe-UKZN, I-Facchochschule Dortmund University ne-University of Johannesburg (i-UJ), okuxhaswe yi-Geman Academic Exchange Service (i-DAAD).

Abacwaningi abakhulu abathathu bohlelo lweminyaka emine nguSolwazi Michael Boeker wase-Facchochschule Dortmund University, uDkt Maud Mthembu wase-UKZN noSolwazi Tanusha Raniga wase-UJ.

Umfundisi noMholi weSikole se-Applied Human Sciences, uSolwazi Matshepo Matoane uthe: ‘Lolu hlelo lokushintshana luhambisana nokusabalala kwemfundo emhlabeni nokuba mandla kwamanyuvesi ngokwabelana ngolwazi, amakhono nemfundo engenamngcele.’

Umqondisi Omkhulu Wophiko LwezokuXhumana lwase-UKZN, uNksz Normah Zondo ukholwa wukuthi izinhlelo nokusebenzisana okunjena kunesandla esikhulu ekuphuculeni izinga lemfundo nokukhiqiza ulwazi e-UKZN. ‘Izinhlelo ezinjena zinhle kakhulu kubafundi bethu abathola ithuba lokuzibona ngezinga eliphezulu lakwezinye izindawo emhlabeni. Abafundi abeza kuthina basuka emanyuvesi esisebenzisana nawo nabo bayazuza kakhulu kithina uma ubheka igama lethu lokuba ngenye yamanyuvesi avelele e-Afrika, eqhubekayo nokukhiqiza ucwaningo olusha emikhakheni eyahlukene.’

Umfundi waseJalimane, uMnu Lorenzo Paciello, uthe: ‘Ngijabule kakhulu ukufunda kabanzi ngomsebenzi wezenhlalakahle eNingizimu Afrika. Loku kuzokwenza sifundisane sikhulise namakhono ethu.’

UNks Ncamisile Masikane woMnyango weZenhlalakahle eKZN okhulume nabafundi ngomsebenzi wezenhlalakahle KwaZulu-Natali nangamathuba nezinselelo ezahlukene, kwathi iMa’ta Institute ese-UKZN yakhuluma ngomsebenzi wezenhlalakahle ngezikhathi zezinhlekelele nobhubhane.

Umfundi wase-UKZN, uNks Kwena Tlhaku, owake waya eJalimane ngokohlelo lokushintshana, ubeke uvo lwakhe ngohlelo lokushintshana, wathi: ‘Lolu hambo ngaluthakasela kanti lungikhuthaze ukuthi ngisebenze ngokuzikhandla.’

Amagama: wu-Melissa Mungroo

Isithombe: wu-Albert Hirasen