I-Royal Society Ihlonipha Izifundiswa Zase-UKZN

BY: .

Click here for English version

Izifundiswa ezimbili eziqavile e-UKZN zihlonishwe yi-Royal Society of South Africa (i-RSSAf).

USolwazi ohlonishwayo wekhemistri u-Bice Martincigh uklonyeliswe njengomncwaningi ngenxa yamagalelo akhe akusebenziseni ingqubomgomo yesayensi ukuxazulula izinkinga zezempilo nezemvelo, kwathi uSolwazi Trevor Hill, womnyango weGeography, waqala ihlandla leminyaka emithathu njengomhleli we-journal yalenhlangano i-Transactions of the Royal Society.

U-Martincigh uthi ukuba yingxenye yeRSSAf, okuyinhlangano yocwaningo oluxube imikhakha ehamba phambili eNingizimu Afrika eminyakeni evile ekhulwini, kungenxa yomsebenzi wakhe endimeni yesayensi kuleli nasemhlabeni jikelele.

‘Kuyintokozo kimi ukuhlonishwa yiRoyal Society nokubonakala komsebenzi wami emikhakheni eyehlukene. Ngizizwa ngithakasile,’ kusho yena.

U-Martincigh wajoyina i-UKZN isabizwa nge-University of Natal ngo-1990 – wafunda kuyo futhi – ezofundisa iPhysical Chemistry. Wafunda waze waphothula iPhD eHorward College, wacwecwa ikhono lakhe lokukhuculula ubuthi ngokugxilisa izifundo zakhe zobudokotela ocwaningweni olwaveza amandla ama-nitrogen donot atoms uma ehlangana nensimbi.

U-Martincigh, ongumncwaningi onentshisekelo yokuqhamuka nolwazi olusha, uke wagxila kwi-photochemistry, ikhemistri yezemvelo, i-solution thermodynamics ne-nanotechnology.

Emkhakheni we-photochemistryn wacwaninga izakhi zemikhiqizo egcotshwayo evikela ilanga nokuhlangana kwayo nokukhanya ukuthola ukuthi kwenzekani uma imikhiqizo egcotshwayo ihlakazeka, ukusebenza kwayo nomphumela wayo esikhunjeni.

Ucwaningo lwakhe olusha beluhlaziya amanzi asebenzile eThekwini ukubheka ubuthi obehlukene, lubheka nezindlela zokuwahlanza ngokusebenzisa imisebe yelanga. U-Martincigh wenza nocwaningo ngamakhemikhali anobuthi acekela phansi imvelo.

Njengothisa ozinikele, u-Martincigh waklonyeliswa yi-UKZN ngendondo iDistinguished Teacher Award ngowezi-2012, futhi uyakuthokozela ukuchazela iabafundi ngendlela ezwakalayo. Ube nesandla ekucijeni osokhemisi bakusasa eNingizimu Afrika, ngokuqeqesha abafundi ababalelwa kuma-50 beziqu eziphezulu, futhi usebenzise ulwazi lwakhe lwe-physical chemistry ukuqhakambisa isayensi kubafundi, wasiza ukuhlela iFFS Expo for Young Scientists, waphinde wenza imilingo emcimbini iKwaZulu-Natal Magic Show, ehlelwa yiSA Chemical Institute.

U-Martincigh uke wavakashela eWest Virginia University nasePortland State University eMelika; University of Wales eCardiff, naseGandhi Institute of Technology and Management e-India. Uke waba ngumcwaningi nomengameli weSACI, wazuza indondo iMerck. Ungumcwaningi weRoyal Society of Chemistry ne-International Union of Pure and Applied Chemistry, nelungu le-Academy of Science of South Africa.

‘Ngifisa ukubonga iNyuvesi, engisebenza nabo nabafundi abangisizile ukuthi ngibe la ngikhona namuhla,’ usho kanje.

U-Hill, onguMholi Wezifundo woCwaningo neZiqu Eziphake eSikoleni Sesayensi Yezolimo, Ezomhlaba nezeMvelo, unamava okuhlaziya uthuli lwezimbali, isimo sezulu sezikhathi esezadlula, ukuphathwa kwezinsiza ezivela emhlabeni, ama-Geographic Information Systems ne-biogeography. Ungumcwaningi eRoyal Geographical Society kanti uke waba ngomunye wabahleli be-South African Geographical Journal.

Amagama: ngu-Christine Cuénod

Izithombe: Zithunyelwe