Isitshudeni Sobudokotela Sase-UKZN Kowamanqamu Emncintiswaneni WoMhlaba Jikelele

BY: .

Click here for English version

Isitshudeni esenza unyaka wokugcina wobudokotela uNks Tivana Chellan sifinyelele kowamanqamu emncintiswaneni we-Global Outstanding Leadership Awards ozobase-Brisbane, e-Australia, ngenyanga ezayo.

Le miklomelo eyalabo abakhombisa ubuholi obunesibindi, umusa nokufaka abanye abantu kwi-Leadership Headquarters, inhlangano yase-Australia ehlinzeka ngezinhlelo zokuthuthukisa ubuholi.

U-Chellan, owaphothula uMatikuletsheni e-Tongaat Secondary School, useke wamela isikole sakhe ezindaweni ezahlukene ngobuholi, okubalwa kuzona ukuba ngumqondisi we-Rotary Interact Club, eyingxenye yenhlangano iRotary yasemhlabeni jikelele yokuthuthukisa umphakathi ngaphezu komuntu. Useke wamela izwe lakhe kwi-Model United Nations, uhlelo lwenkulumo-mpikiswano yaphesheya enika abantu abasha abazimisele ithuba esithangamini esinjengeNhlangano yeZizwe ngokumela amazwe emakomitini ehlukene adingida izindaba ezimqoka ezihlukene.

U-Chellan uhlomulile ngokuqeqeshwa nokucijwa ngokusebenza nesishabasheki samalungelo abantu uNks Ela Ghandhi ne-Consul General yase-India eziNdlini zamaNxusa zaseNdiya eThekwini.

Useke wabasezikhundleni zobuholi ezihlukene esewumfundi wezobudokotela okubalwa kuzona ukuba nguMengameli we-South African Medical Students Association (uPhiko lwase-UKZN) kanti uyiPhini likaSihlalo lethimba locwaningo lwezokwelapha lweDini futhi acije abalingani bakhe ngezempilo.

Ngonyaka wama-2020 wasungula ithimba le-COVID-19 ukubhekana namampunge kanti enaleli thimba baqamba isifungo esithi I-Care ukukhuthaza ukugcina imigomo yomvalelandlini. U-Chellen wasebenzisana nabaholi bezempilo yomphakathi ukusungula ividiyo ngokugeza izandla i-Tippy-Tap community nezinye izinhlelo ezihlomisa abantu.

Wethula umkhankaso wesifundazwe wezinkundla zokuxhumana wokulwa nokuhlukumeza ngokobulili ukukhuthaza abantu ukuthi bakhulume nokugqugquzela amadoda ukuthi abe neqhaza elibonakalayo ukuletha uguquko.

U-Chellan, owamela i-Africa kwi-United Nations Media and Information Literacy Week ngowama-2020, useke wasebenza namanxusa ase-China, e-Brazil, e-France, eMalawi, eJamaica namanye amazwe ukuqeda amampunge nokuhlomisa abantu ngobuchwepheshe besimanje.

U-Chellan uthe: ‘Ngithakasile ngokufinyelela kowamanqamu kulo mncintiswano womhlaba jikelele ngiseneminyaka engu-23 kuphela nokuqhudelana nabaholi abaqavile basemhlabeni jikelele. Inhloso yami wukukhuthaza intsha kanti ngenxa yalokho ngizibophezele ukuba yisibonelo. Ngigxile ekukhuthazeni abantu besifazane ukuthi bazuze noma yini abayifisayo. Ngiyisishabasheki sezempilo yengqondo kanti ngikholwa wukuthi abahlinzeka ngezempilo kufanele banakekele impilo yabo ukuze bezokwazi ukunakekela iziguli ngokusezingeni eliphezulu.’

U-Chellan umele izitshudeni kwi-UKZN Mental Health sub-committee.

Amagama: wu-MaryAnn Francis

Isithombe: Sithunyelwe