USolwazi Ncoza Dlova, IDini neNhloko eSikoleni Sezokwelapha e-UKZN. Ukwethulwa KweSikhwama Sosizo SikaSolwazi Ncoza Dlova
Click here for English version
IDini neNhloko eSikoleni Sezokwelapha e-UKZN, uSolwazi Ncoza Dlova yethule isikhwama sokuxhasa abafundi bobudokotela abakweletayo.
Lesi sikhwama sizoqinisekisa ukuthi labo abathwele kanzima ngakwezezimali bayakwazi ukufunda njengoba lokhu kutshala imali kodokotela bangomuso kuzokwandisa izibalo endimeni yezempilo ethwele kanzima.
UDlova uthe: ‘Iningi labafundi bethu e-UKZN liqhamuka emiphakathini entulayo. Lokhu kuyavela kwinqubomgomo yethu yoguquko – ama-70% abafundi bethu ngabantu abamnyama abavela ezikoleni eziku-quintile 1 no-2. Ukuze sibasize bagxile ezifundweni zabo ngaphandle kwezinkinga zezimali, sinxusa bonke abanganikela, izinhlangano ezizimele, osomabhizinisi, ababefunda eNelson R Mandela School of Medicine e-UKZN nabake bahlala e-Alan Taylor residence ukuthi basisize ngokunikela.’
Emcimbini obuse Nelson R Mandela School of Medicine, uDokotela Imtiaz Sooliman, owayengumfundi nomsunguli weGift of the Givers, uzibophezele ukunikela ngo-R3 million ukusiza abafundi bezobudokotela abakweletayo ukubhalisela ukufunda kulo nyaka.
Abafundi bakulesi siSikole bazibophezele ukuxhasa lesi sikhwama, abanye bathi bazonikela nge-R100 njalo ngenyanga. UMnuz Tyrell Pillay, owenza unyaka wesihlanu kwezobudokotela, uthe: ‘I-Professor Dlova Medical Student Fund izohamba ibanga elide ekubumbeni abaholi kwezempilo bakusasa. Imali izosetshenziselwa ukuqinisekisa ukuthi abafundi abantulayo abancishwa ithuba lemfundo futhi banethuba elihle ukufeza iphupho labo.’
UNksz Zinhle Mzobe, owenza unyaka wesine, uphawule wathi: ‘I-Professor Ncoza Dlova Medical Fund izoqinisekisa ukuthi abafundi abantulayo abasali ezifundweni. Imali izosetshenziswa ukuze bakwazi ukufunda ngale komthwalo wesikweletu emahlombe.’
Iminikelo yalesi sikhwama izokwemukelwa yi-UKZN Foundation kanti abanikelayo bazothola isaphulelo sentela. Ngeminye imininingwane ngalesi sikhwama, vakashela ku: https://youtu.be/Y8ePQVACgmo.
• Xhasa odokotela bangomuso (Umuntu ngumuntu ngabantu). Xhasa ikusasa – Xhasa umfundi ngemali ube yingxenye yesisombululo!
Amagama: ngu-MaryAnn Francis
Isithombe: Sithunyelwe