Amaqembu ase-UKZN Angenele Umqhudelwano wezi-2014 we-SASOL Mini Baja

BY: .

Click here for English version

Amaqembu amabili abafundi bamabanga aphansi basesikoleni sezobuNjiniyela e-UKZN azobamba iqhaza kumqhudelwano i-SASOL Mini Baja wezi-2014 e-Gerotek ePitoli kule mpelasonto.

Izingxenye eziningi zezimoto zakulonyaka zidwetshwe zaphinde zakhiwa emagcekeni eNyuvesi eshabhu lezobunjiniyela bokukhenikha ekhempasini i-Howard College. 

Umholi womsebenzi uSolwazi Freddie Inambao, uthe: ‘Abafundi bayagqugquzelwa ukuthi basebenzise ulwazi abaluthole emakilasini ukuze baqhamuke nezindlela zokudweba nokwakha ezenza umsebenzi we-Mini Baja SAE ube ohlukile. Ulwazi abaluthola kulo msebenzi neminye lubanika ithuba elingcono lokuthola umsebenzi kule mboni.’

Inhlosongqangi yeqembu ukuthi imoto yabo ikhethwe ibe i-Mini Baja ephuma phambili ngokokusebenza kwayo emqhudelwanweni.

Ilungu lika-Team 1 uMnu Novashan Moodley uthe: ‘Umqhudelwano i-SAE Baja uyindawo eyakhelwe ukukhombisa abafundi basezikhungweni zemfundo ephakeme umkhakha wezokudweba nokwakha izimoto nokubaluleka kokuhlela uma sekusemsebenzini. I-Mini Baja esiyifakile yilena esayakha ngo-2012 njengomsebenzi wonyaka wokugcina. Njengoba yalala indawo yesithathu kulowo nyaka, sizimisele ngokuwina kulo nyaka.

‘Sikhethe ukuqhubeka nokuningi esasikusebenzisile ngoba kwazikhombisa ukuthi kuyakwazi ukumelana nokuvivinywa okunzima kwalomjaho futhi kwajabulisa namajaji nakweminye imiqhudelwano. Izinguquko zithinta injini entsha nokubeka u-gearbox esixhaswe abakwa-Briggs and Straton   ngawo emizamweni yokunciphisa ukushisa ngokweqile okwakukhathaza iqembu lango-2012 ngesikhathi sekubhekwa ukubekezela kwemoto emqhudelwanweni.’

Umholi wezokuFunda kwezobuNjiniyela bokuKhenikha uSolwazi Glen Bright, uthe uyaziqhenya ngamaqembu ase-UKZN futhi uwafisela inhlanhla emqhudelwanweni.