Isishoshovu Sezobulili EsiyisiFundiswa Siqokwe njeNgomfundisi ohlelweni lwezoBulili nezeNkolo

BY: .

Click here for English version

Uhlelo lwezoBulili nezeNkolo lwase-UKZN lusanda kwamukela isishoshovu esihamba phambili kwezobulili nesiyisifundiswa uDkt Fatima Seedat njengoMfundisi.

Umsebenzi ka-Seedat omkhulu ukuxhumanisa i-Network for Sexual and Reproductive Health Rights eyingxenye yeSikole sezeNkolo, ubuNzululwazi, nezaseMandulo.

Ekhuluma ngokuqala kwe Network for Sexual and Reproductive Health Rights, umholi walolu hlelo uSolwazi Sarojini Nadar uthe ezemfundo nezempilo  zilokhu ziyizinhlangothi ezibalulekile ngokomlando emsebenzini womxhasi omkhulu wohlelo okuyi-Church of Sweden (CoS).

Ngenkathi kubhekwene nesimo sokuthi izinhloso zesi-4 neyesi-5 zenkulungwaneminyaka - okuwukunciphisa ukushona kwezingane nomama bazo- okwakubukeka sengathi ngeke zifezeke, i-CoS ibambisene ne-Swedish Development Agency yathatha isinqumo sokungenelela.

Ekuqaleni kwezi-2012 iCoS yaphakamisa enye yamasu amathathu okuyizifundo ze-Masters kwezoBulili, ezeNkolo nezempilo ukuze kubhekwane nemibono yezenkolo namasiko emhlabeni mayelana namalungelo athintene nezempilo kwezokuzala nezocansi, ubulili nokuzazi ubulili.

Ngonyaka wezi-2013 uhlelo lwaqalwa eTopiya, Thanzaniya, e-Stellenbosch nase-UKZN.

UNadar uthe kuyamthokozisa ukwamukela uSeedat njengengxenye yohlelo. ‘UDkt Seedat ufika namakhono nesipiliyoni esikhulu okumenza abe umuntu ofanelekile ukuxhumanisa lolu hlelo. I-PhD yakhe yaseNyuvesi yaseMcGill e-Montreal ibihlola ukuphathwa ngendlela enokucwasa kwabesifazane emthethweni wamaSulumane.’

‘Uthathe izindlela zokuhlaziya zomlando wobunzululwazi kwezamalungelo abesifazane, izifundo ezimqoka kwezomthetho nezifundo ngomzimba wowesifazane ukuze ahlaziye ukuthi umthetho wamaSulumane uwuthatha kanjani umzimba womuntu wesifazane nobulili bakhe ngaphansi komthetho,’ kusho uNadar.

USeedat ugxile kakhulu ocwaningweni lwakhe ekubhekeni ukuthi ukwahluka ngobulili kwakha kanjani umehluko ngokwenhlalo. Ngokuzinikela kwakhe ezinhlelweni zoguquko kwezenhlalo nomthetho, umsebenzi wakhe wesikhathi eside uhlola ukuhlangana komlando namasiko ekwakhekeni kokuhluka kobulili, luhlole nezobulili ngokwezinkambiso zesimanje nezindlela zomthetho ezintsha.

Uphinde abe neziqu ze-Masters ezifundweni zobulili nokuguquka kwesimo senhlalo azithole kwi-African Gender Institute eNyuvesi yaseKapa neziqu zenkolo nezepolitiki zaseNyuvesi yase-Toronto.

Ngaphambi kokuqala izifundo zakhe zobudokotela ngonyaka wezi-1998 kuya kwizi-2001, usebenze njengePhini loMqondisi ehhovisi lephalamende lekhomishana yezokulinganiswa kobulili. Ubuye waba nezikhundla ezahlukene kwiHhovisi Lezamalungelo Abantu, uMnyango Wezangaphandle nezikhundla zokufundisa eNyuvesi yaseKapa neyase-McGill.

Ngonyaka wezi-2000 wasungula iShura Yabafazi okuyinhlangano ezimele yaseNingizimu Afrika elwela ukulinganiswa ngokobulili emthethweni womndeni wamaSulumane futhi kusukela ngezi-2009 ubengummeli we-Musawah okuyinhlangane yabesifazane yamazwe ngamazwe.

Emisebenzini yakhe emidala kubalwa ucwaningo nokubhalela i-Knowing Our Rights okuyincwajana yamaSulumane yezomthetho wasekhaya waphinde wabhala ngokuhlanganyela i-Women’s Rights in Muslim Communities : A resource Guide for Human Rights Educators for Equitas International Centre for Human Rights (eMontreal).

Njengoba ezalelwe eThekwini wakhulela Esiphingo, uDkt Seedat uthe, ‘Kuyangithokozisa ukubuyela ekhaya futhi kuyinhlanhla ukuba yingxenye ye-Genger and Religion Programme.’

‘Imibono ngamalungelo ezempilo yezokuzala nocansi akhiwe kakhulukazi, kodwa ngokungenhloso, yimibono yezokholo mayelana nokwehluka kobulili. Njengoba kukhula indima edlalwa yinkolo kwezobuhlanga, ubuzwe nezendawo eNingizimu Afrika, lokhu kuyithuba elihle lomsebenzi wokuhlangana kobulili, inkolo namalungelo ezempilo yezokuzala nocansi. Nginethemba lokuthi nezinye izinhlelo zizothola ubudlelwano nalo msebenzi futhi ngikulindele nokusebenzisana nabanye ukuze siqhube lezi zingxoxo.’

USeedat umagange ukuthuthukisa iqeqeba longqondongqondo emkhakheni wezobulili, ezenkolo nezempilo. Lolu hlelo lunemifundaze eyishumi yabafundi beziqu ze-Masters. USeedat utholakala ku-seedatf@ukzn.ac.za uma udinga eminye imininingwane.

Ibhalwe ngu-Mellisa Mungroo