uNksz Willene Holness.Isifundiswa sithole umklomelo ophambili engqungqutheleni yezomthetho
Isifundiswa sezomthetho saseUKZN uNksz Willene Holness uphume phambili waklonyeliswa ngomklomelo onikwa owethule inkulumo ezedlula zonke owaziwa ngele-First Presenters Prize engqungqutheleni yeSociety of Law Teachers of Southern Africa ebihlelwe yiNyuvesi yaseWitwatersrand.
Iphepha likaHolness elidle umhlanganiso belinesihloko esithi: “Omama abangekho esimweni sokuba abazali: Isidingo sezinguquko kwezoMthetho ukuze kubhekwane nodaba lokususwa kwezingane kubazali abanokukhubazeka ngokwengqondo eNingizimu Afrika”.
Lo mklomelo waminyaka yonke uklonyeliswa umfundisi osuke ethula inkulumo okokuqala ngqa kule ngqungquthela.
Le ngqungquthela inikeza labo abafundisa ngezomthetho eNingizimu Afrika ithuba lokuxhumana nabasafufusa kanye nongoti kwezomthetho ukuze bacobelelane ngemibono kanye nemiphumela yocwaningo oselwenziwe.
Iphepha likaHolness beligxile ekubuyekezweni kwemibhalo emayelana nokususwa kwabantwana kubazali abanokukhubazeka ngengqondo ngenxa yezinsolo zokunganakwa kwabantwana.
Bekuwukufunda okuqhathanisayo obekubheke izifundo zaseAustralia, eUnited Kingdom Kanye naseUnited States kwase kuhlaziya okuqukethwe yiSouth African Children’s Act yango2005 mayelana nabazali abakhubazekile kanye nabantwana babo.
‘Ngibheke izinto ezibeka abazali engozini yokuphucwa abantwana babo ngoba bekhubazekile ngokwengqondo. Lezi zinto: ububanzi bomthetho, izinkolelo ngokulungela kwabo ukuba abazali, ukungasekelwa abezenhlalakahle nokusweleka kolwazi mayelana namalungelo abo okokugcina izinto ezifaka ingcindezi njengobubha nokungabi sesimweni esiphilile ngokwengqondo nomzimba.
‘Umqhudelwano bewusezingeni eliphezulu kanti ngizizwa ngihloniphekile ngokunikezwa lomklomelo. Ukwesekelwa engikuthole kozakwethu ebesinabo kule ngqungquthela kuphakamisa izinga kakhulu,’ kusho uHolness.
UHolness uzimisele ngokuqhubeka nocwaningo lwakhe kulo mkhakha ngoba kunezibalomdanti ezincane kakhulu futhi nokufunda kulo mkhakha kuncane kakhulu futhi uzimisele nokukuqedela izifundo zakhe zeziqu zobuDokotela kwezoMthetho.
Click here for English version
- Thandiwe Jumo