24 August 2023 Volume :11 Issue :39

Umhlangano Wokwamukela Abazofunda Izifundo YeSayensi Yamakhompyutha

Amazwibela omhlangano wokwamukela abafundi.Click here for English version

Isikole sase-UKZN seZibalo, Izibalo Zokubonisa Ukuma Kwendaba kanye neSayensi yamaKhompyutha, i-UKZN School of Mathematics, Statistics and Computer Science, ngokubambisana nebhange iFirst National Bank (FNB) kanye nabeBusiness Systems Group (BSG) ibambe umhlangano wokwamukela abafundi ekhempasini yaseWestville kanye neyaseMgungundlovu yabafundi abazofunda iSayensi yamaKhompyutha.

Ukuqhakambisa ubumbano phakathi kwabazofundela ukuba ngososayensi bamakhompyutha, iSikole simeme abafundi abenza unyaka wokuqala kuya kwabaphothule iziqu zabo zokuqala.

Umcimbi uvulwe ngezinkulumo zokwamukela ezenziwe uMphathi kanye neNhloko yeSikole uSolwazi Serestina Viriri, kanye nePhini leShansela eKolishi uSolwazi Fhatuwani Mudau, amazwi akhe agqugquzelayo amukelwe kahle abebeyingxenye abalalele ngokucophelela ngesikhathi abakhulumayo beqhakambisa iqhaza elibalulekile elidlalwa isayensi yamakhompyutha ekubumbeni umhlaba wakusasa.

Abebehamba phambili ekuhleleni umcimbi wokwamukela abazofunda bekunguNkk Rosanne Els, ofundisa emkhakheni weSayensi yamaKhompyutha kanye nomholi wezemfundo kwiSayensi yamaKhompyutha e-UKZN uDkt Mandla Gwetu, ochaze inhloso yohlelo lwezikibha olwalukhona ukuthi luphinde lubuyise umuzwa womphakathi kubafundi beSayensi yamaKhompyutha njengoba baphucwa ngesikhathi se-COVID-19 njengendlela yokushintshela ngokushesha ekufundiseni nasekufundeni nge-inthanethi.

Izikibha zeSayensi yamaKhompyutha bezixhaswe abebebambisene emcimbini, iBSG kanye ne-FNB. Umcimbi ubuye waba ithuba lokubungaza ukubumbana kanye nokwabelana kwezifiso kwabangena emkhakheni wososayensi bamakhompyutha emphakathini wase-UKZN.

Abebemele abakwa-BSG nabase-FNB bakhulume nabafundi nothishanhloko omkhulu kwezokweluleka ngoshintsho kwa-BSG, uMnuz Rishi Birbal, obenza izethulo ngaphansi kwesihloko: Vula Amathuba Akho, Sheshisa Umsebenzi Wakho, ngesikhathi oweluleka ngesisombululo sezokwakha eFNB uNksz Bhavna Pithamber, obekucacisa ukuthi iFNB isungule kanjani isikhala sobuchwepheshe kanye nokwabelana ngezeluleko ezibalulekile kwabafuna umseebenzi.

Abebebambisene ekuxhaseni umcimbi bebenezintende zokukhangisa lapho abafundi bebekwazi ukukhuluma nabo futhi bathole ulwazi olubalulekile ngamathuba omsebenzi eFNB naseBSG.

Abafundi babuye baxoxisana nababenza izifundo zeSayensi yamaKhompyutha uNksz Ayesha Osman wase-BSG, uMnuz Sahil Lawton kanye noMnuz Alexander Goudemond.

Abebeyingxenye bahlanganyele emcimbini wokuqhudelana ngomdanso babuye bathola izikibha zesayensi yamakhompyutha ezisikwe owayenza iziqu zeSayensi yamaKhompyutha uNksz Salurie Padayancee, obekuwuphawu lokuxhumana okubalulekile phakathi kwabafundi kanye nabafundisi kanye nokuqhakambisa uhambo kulo mkhakha.

U-Els ubejabule kakhulu, ethi ubekade efisa ukukhulisa umbono wokuhlelela abafundi izikibha kanti ukufika kwabebeyingxenye ngobuningi kanye nokuthakasela umcimbi kwabo kwedlulele kwabekulindele. U-Els uzwakalise ukubonga ku-Leeta Rajpal kanye nethimba lakhe ukwenza umcimbi ube impumelelo ngendlela obuyiyo.

Amagama: wuSiphesihle Owen Shezi

Izithombe: Zithunyelwe

author : .
author email : .